來來往往歐洲之旅

辛苦左三四個月，終於寫完論文後就正式完成課程搬去Sheffield。搬去Sheffield之後行程十分之緊迫，因為就此開始兩個月來來往往歐洲之旅。

一般人由香港飛歐洲，當然會一次玩幾個國家慳返程飛機同時間。但身處英國，機票有時仲平過火車飛，當然係逐個逐個國家去。兩個月之中去左七個國家，十五個城市，幾個小鎮，睇左好多以前只會係電視或者上網睇到既野，亦都玩左好多從來冇諗過自己會玩既野。

最鍾意既hostel係Frankfurt Hostel，因為員工友善，裝潢有性格，環境算幾乾淨衛生。最重要既，係我分開住兩日，兩日都咁岩有free pasta，咁就慳左兩餐飯錢。

最鍾意既酒店，係位於瑞士小鎮Celerina既All in One Hotel Inn Lodge。可能係夜晚關係，位置偏僻有ｄ難搵，但係一入到房就覺得又驚喜又可惜。成間房根本就係典型北歐設計，下層係一張雙人床，沖涼房，仲有個開放式小廚房，上層就係兩張單人床，仲有個好大既秘密基地。可惜個晚我只係路過夜宿一宵，第日就要踏上Glacier Express去Zermatt，冇得住多幾晚。

最瘋狂突發既行程，就係係Prague突然間走左去skydiving。 雖然本來都諗住係英國會去玩，但因為種種原因冇去到，亦都諗住冇得去。竟然去到Prague有個偶然既機會，冇認真考慮同計劃過就咁就上左陌生人既車，上左飛機，同個陌生人綁埋一齊跳左出飛機。

最無聊既行程，就係夜探威尼斯嘆息橋，再係嘆息橋邊唱何韻詩既《嘆息橋》。

最夢幻既行程，就係係Reykjavik附近既Blue Lagoon浸溫泉。一入到溫泉區望入去，淺藍色既溫泉水上面煙霧迷漫，真係以為自己上左天堂。

最勞動既行程，就係係Solheimajokull冰川攀冰，其實主要係畀人拉上去。

最迷離既經歷，就係係Amsterdam大雨下落錯車，行左好耐先搵到酒店。第二日發現唔見左野，係極之細既房搵極都搵唔到。之後又再係Amsterdam迷路，天都黑齊都仲未搵得到返酒店既路。

雖然冇ｄ所謂遊記作者既特別經歷，不過呢兩個月既來來往往，為我係英國一年幾既生活帶黎一個如夢似真既完結。有時諗返起，都會覺得好多經歷都唔太真實，但的的確確係短短兩個月內發生左。有時真係好想好似"The Entire History of You"咁隨時播返自己既經歷出黎。可惜，記憶永遠模糊，人生永遠沒有重來。

芝士蛋批

一直都想試下整Tortilla，但係宿舍個煎pan太大，個爐又唔係明火，好難整到。於是就偷雞用焗爐整個類似既蛋批。

材料：蛋、薯仔、露筍、洋蔥、煙肉、芝士、牛油、六寸錫紙兜

首先預熱焗爐到220度。露筍切片，薯仔去皮切薄片之後浸一浸水；洋蔥切絲，煙肉切條

　

用牛油起鑊炒香洋蔥，之後落煙肉炒熟；最後落埋露筍同薯仔炒軟，落少少胡椒粉同鹽調味

將所有炒好既料倒落圓形錫紙兜，倒入打好既蛋，再係上面鋪芝士

　

放入焗爐焗15-20分鐘，表面芝士微燶同埋蛋全熟就食得；切開見到一層層既薯仔，加埋煙肉好有少少鹹香味；可以當正餐又可以當下午茶

Cardiff至Sheffield螞蟻搬家驚險之旅

九月中交完論文之後將會搬去Sheffield，但係一次過自己一個搬去Sheffield係冇可能既事，於是就先去一次Sheffield幫人搬家，順便自己黎一次螞蟻搬家。拉住一個超大既luggage，由宿舍行去火車站，需時只係九個字，但係我就預左一個鐘零三個字。因為呢排實在太黑，又拉住個咁大咁重既luggage，我ｄ咁「穩重」既人梗係會預早ｄ。點知…黑就係黑，無論你幾穩重，都會有霉事發生…

準時上車，將luggage擺係行李架下層，就安心坐低，聽歌訓覺。因為離轉車站有兩個幾鐘車程，從未因為訓覺而miss站既我就好安心咁訓覺。訓左個零鐘就起身，見未到，就訓下醒下。心中有數大約幾時會到。

再訓左陣火車停左，我估到左轉車站Stockport，於是起身望清楚。點知望黎望去都望唔清究竟係咪到站。到我望到既時候，知道冇咩時間淨，即係衝去攞我個巨大luggage落車。點知好衰唔衰，個luggage竟然係呢個時候塞住左係個行李架，拉唔到出黎。呢個時候車門開始關上，企係門口位姐姐幫我係咁禁開門制，但係車門依然堅決要關上。到我攞到個luggage出黎既時候，車門已經緊緊關上，我再禁開門制佢都唔肯開門…T_T

另一位係門口既姐姐就話我可以去總站Manchester轉車返Stockport。但係再轉就唔知趕唔趕得切搭去Sheffield既車。於是即刻打電話求救，好彩有人係Sheffield做支援。得知有班車岩岩好係Manchester開，經Stockport去Sheffield，到Sheffield既時間同我原本要搭個班一樣，相信就係我要搭個班。於是我就冷靜地搭左幾分鐘去到Manchester落車，再行去第二個月台等另一班車。

好喇，去到第二個月台，睇睇版，無錯係去Sheffield。個時離開車時間仲有十幾分鐘，月台上有火車停左係度。我就係度等，等月台上既車開走，我要上個班駛入黎。點知…命運再一次捉弄我。我要上個班係二十分開，停係月台個架火車十九分半閂門。係閂門個一刻，我突然發現呢架停係度等左十幾分鐘既火車，就係我要上既火車。於是我仍然用比較冷靜既步速行埋去禁開門制。OK，火車既開門制再一次拒絕我，我連續兩次miss左火車！！

黑就係黑，我明明見到架火車寫住既目的地同版上面我要上既車既目的地一樣，我竟然冇意會到停係度等開車既，就係我要上既火車。真係鬼掩眼！於是，我仍然用一個比較冷靜既心情行去月台上既職員度，淡然咁同佢講：I miss the train. 職員亦都好平淡咁回應一句：I know. 係呢個時候，我仲可以點呢…惟有同佢解釋成件咁荒謬既事，睇下佢有咩對策。佢話43分有一班車去Sheffield，但係唔同公司，佢唔可以叫人畀我上。而同一公司既車，就係下一個二十分先開，佢可以叫人畀我上唔使再買過飛。但係時間緊迫，因為Sheffield個邊已call左的士搬屋。真係兩難…如果我上第間公司既火車，可能會畀人check到要買過將飛，如果我等同一間公司既火車，又太遲先到Sheffield。

於是我離開月台，去站頭行個圈冷靜下，最後決定博一博。再行返入月台既時候，有職員守住要check飛，我就行埋去又講返我既情況。個位姐姐，其實應該唔多了解我情況，只知我要去Sheffield，就畀我入左去仲話我知邊個月台。我去到月台，有個職員係waiting room玩電話，我唔敢打擾佢，驚佢一個唔高興唔畀我上。等到我要上個班車黎，佢終於出黎，於是我就追住佢問佢可唔可以畀我上。佢竟然又點我去個guard度問，呢個時候ｄ人已經急急腳趕上車，我都唔可以再冷靜落去。所以就拉住個巨大luggage衝去車尾問個guard畀唔畀我上。佢都其實冇聽清楚我情況，就話：no worry, go go. 佢咁樣go go 搞到我都緊張埋，於是又拉住個巨大luggage衝去普通卡上車。上到車，擺好luggage搵個位坐低，我終於可能冷靜落黎。

火車離開Manchester去到Stockport都冇人黎查飛，我諗住應該冇事。點知係Stockport開左車冇耐，剛才go go guard就出現黎查飛：Any ticket from Manchester? or Stockport?佢講到Stockport時望住我，睇黎佢係特登遲ｄ黎查飛，等我可以名正言順搭上呢班車。於是我就攞張飛出黎畀佢睇，佢睇左一下就去查第個人。點知，命運一而再再而三咁捉弄我，佢查第個人既時候發現時間唔同。即係我搭個班其實係遲左一班，即係話我遲到。go go guard就問我：you are late? 我又緊張起來：yes i missed the stop in Stockport, becos my huge luggage got stuck. 我指指個luggage，確實幾huge，go go guard就話OK。我連聲sorry同thank you，go go guard就離我而去…終於，我都冇穿冇爛咁到達Sheffield，只係比原定時間遲左十零分鐘。

後來再搭火車返Cardiff既時候，終於回覆返正常狀態，冇事發生。不過就見到另一件搭火車既麻煩事。有位姐姐上網買飛，收到confirm email就當係車飛，冇去站頭print返張正式既飛出黎。唔知係姐姐態度唔夠誠懇，唔識扮傻或者扮慘，定係職員正直不阿，佢罰左姐姐43鎊。哈…我買個時都只係22鎊，只係冇print飛出黎就罰43鎊。呢個故事教訓我地收到confirm email一定要睇清楚。