旺角點心棧（20101226）

之前興食點心，仲要係米芝蓮喎，我ｄ咁懶巴閉既人梗係冇跟風啦。硬係鍾意過左氣先黎做。家下ｄ點心專門店越開越多，遲下又好似珍珠奶茶咁爭生意。係旺角搵左間似乎係新開既試下。坐得唔算太舒服，茶就得個三種：鐵觀音﹑普洱同五花茶，仲要係等人斟，跟住每次斟既時候就要問下人飲咩先，真奇怪。好彩斟左一兩次之後佢已經記得。

四個人叫左十幾個點心，最後都食唔晒
　

鳳爪排骨飯，淨係食左飯，索左ｄ汁幾好味


煎蘿蔔糕同墨西哥叉燒包；蘿蔔糕夠蘿蔔唔係成口粉；墨西哥叉燒包又鹹又甜，一般


蝦餃﹑叉燒包同鳳爪；蝦餃皮薄蝦爽滑；叉燒包夠鬆軟；鳳爪冇食


鬆糕同流沙包；鬆糕甜左ｄｄ但真係好鬆，凍左都好食；流沙包個餡係真係流質，鹹蛋黃好香不過好油
　

腸粉就叫左叉燒腸同蝦腸，幾滑，質素正常


燒賣﹑鵪鶉蛋燒賣同蒸排骨，都係正常質素；鵪鶉蛋燒賣比較特別唔係度度有得食，不過個底其實都係燒賣個ｄ料；排骨冇食
　

鮮蝦腐皮卷同白灼時蔬；腐皮卷蝦爽滑，好脆但好油；白灼時蔬揀左菜心點知全部都係莖冇葉，失望


成餐晚飯食左二百幾，每人都係五十蚊到算幾抵。樓面唔大又冇乜人幫襯，所以斟茶同出菜都幾快。想食點心又唔想排隊既係一個好選擇。