高雄：旗津單車便當

唔知旗津算唔算係高雄必遊景點，但似乎都幾多本地人去玩。由鼓山輪渡站搭渡輪過去，只係幾分鐘時間，仲可以租埋架單車一齊搭船過去添。另外一落船行前少少又有得租，仲有四人單車，真正四個人都要踩既單車，而唔係只係前面兩個人踩個種。見到呢種家庭單車，就諗起自己兩三歲時著住件黃色露臍背心坐係架家庭單車前面個兜度既情景。當然呢個情景係睇返相先記得啦。

四個人踩住架單車係馬路上「飛馳」，細膽既我梗係咿哇鬼叫。踩左好耐都踩唔到目的地，好彩中間都有ｄ靚景睇下。幾經辛苦終於到左目的地－風車公園。哦～原來就係咁～通常ｄ景點都係呃人既～
　


踩返去還車既期間有少少盪失路，盪下盪下又開始肚餓。雖然馬路兩旁都有ｄ鋪頭，不過就好似冇乜好食。踩左又係好耐先搵到間似樣ｄ既。但係又要趕住返去還車，於是就買便當一路踩一路食，真係好effecient。

紙盒便當魯肉飯，見到呢個便當又回憶起細個既時候屋企樓下有間紙盒裝既茄汁豬扒飯。雖然唔記得咩味，不過細個個時係覺得幾好味既。魯肉唔係幾夠多，不過都岩岩好撈到飯。肥膏多過肉，係呢個咁餓既時候食乜都好味。