荃灣爭鮮迴轉壽司（20090603）

終於都試到期待已久既爭鮮。荃灣呢間應該係全香港第一間爭鮮既迴轉壽司店。之前新開張全店半價，排隊排到落樓下，想試都試唔到。唯有趁平日lunch時間先有位。

入到去間鋪都幾大，好似全部都係迴轉枱，仲坐得幾迫添。我一個人畀人安排坐係轉角位，位就幾迫，但係枱就好多位。
　

Wasabi同台灣外帶店既係一樣


首先梗係食個三文魚壽司，三文魚唔算厚，唔係唔新鮮又唔係極之新鮮，總之就係唔難食


之後攞碟花之戀，一碟一舊；三文魚幾大片，唔係細到只係岩岩包晒ｄ飯，大片到包到兩層咁滯；一樣係不過不失


龍蝦沙律軍艦，紫菜算脆，唔會話擺左好耐好淋咁；帶子壽司，呢個有驚喜，食得出帶子既鮮甜味；
　

唔知乜卷，一碟一舊好大舊好多料，有ｄ都唔知係咩黎，純粹想試下；有少少奇怪既係舊卷外面包左層保鮮紙，應該係包住黎切既，唔知點解唔搣左先上碟


最後食多碟蝦沙律壽司已經好飽


初初係街睇到佢張傳單得好少款壽司，仲以為真係得咁少，原來仲有好多其他款，基本一般壽司都會有。例如吞拿魚﹑玉子﹑甜蝦﹑八爪魚﹑螺肉﹑腐皮﹑蟹子﹑刺身仲有海膽。另外仲有ｄ熟左既蝦，有ｄ連殼有ｄ剝埋殼，唔知係咪真係有人會食。以上全部都係8蚊碟，當然咁既價錢唔好expect佢好新鮮好好食，不過真係唔差既。有時突然想食壽司又唔想食咁貴都係一個好選擇。