伯爵茶朱古力

繼伯爵茶奶凍之後又一伯爵茶系列，伯爵茶朱古力。好耐之前食過agnes b既伯爵茶朱古力，茶味香濃，朱古力味同伯爵茶味好夾，可惜唔夠滑。今次試下自己整，睇就好似好簡單，要整得靚就真係要試多幾次。

材料：淡忌廉50ml﹑伯爵茶包1個﹑牛奶朱古力125g﹑淡牛油17g﹑可可粉適量


先煮熱淡忌廉，落伯爵茶包煮滾，熄火之後焗一陣至茶包出味同埋忌廉變色


隔渣之後加埋牛奶朱古力粒及牛油攪成朱古力漿
　



朱古力漿倒入朱古力模；為左今次既伯爵茶系列特登買左個娘爆花花矽膠模，而呢個模已經係咁多款之中最唔娘架喇；矽膠即係潛建物主要材料，人地話矽膠模易脫模ｄ，事實證明係真既；倒左落模之後就攞去雪2-3個鐘
　



之後將朱古力脫模，掉晒落去個裝左可可粉既盒度搖均佢，咁ｄ朱古力就會黐滿晒可可粉；我用既係冇糖既純可可粉，要加少少糖霜先有甜味；可惜正當我想脫之際，發現朱古力太軟，軟到根本成唔到形成pat野咁，所以惟有搵羹搲佢出黎；上左可可粉之後個樣都唔算嚇人既…
　

　

淨返一pat蘇州屎，要用羹食左佢


原本個食譜要用80ml既忌廉，就係因為太軟，下次用返50ml就應該岩岩好。食落好滑，但係甜左少少，改用黑朱古力會濃ｄ但係就冇咁滑。至於茶味都有ｄ不過就唔算濃，再濃多少少就perfect喇。

牛奶朱古力，$23 / 250g
娘爆花花模，$28