長洲行下食下（20100619）

難得既戶外活動入長洲又撞正天氣勁好，流左好多汗曬黑左少少，仲食左好多之前食唔到既野。

首先食個午餐／下午茶，行行下見到有間叫做海之日既日本野既易拉架棟左係條街度，跟住個地圖搵左一陣就搵到。入到黎長洲都要食日本野…

牛仔骨定食$46，有沙律﹑加州卷同麪豉湯，都係一般貨式
　

　

魚生冷麪$25，魚生出奇地幾新觧，但係個冷麪汁唔知點解有蒜茸


食飽之後周圍行下，係沙灘坐下食條久仰大名既薯塔$18。岩岩炸起都算脆，但係可能自己落得太多味粉，好鹹，比起係韓國食既爭好遠。


坐坐下又到晚飯時間，去左允升食茶葉蛋$3，為免兩個人坐係度食兩隻茶葉蛋咁樣衰，就叫多碗芒果西米露$14。平時我都唔多食糖水，又麻麻地芒果，但係呢碗賣相咁普通既芒果西米露真係好正。芒果當造，好靚好甜，西米發得岩岩好，少少煙韌又唔會黐埋一舊。實在好回味。
　

食完茶葉蛋同糖水就等小販檔出黎，買左個炸兩同叉燒腸上船食，又要返去唔係人住既香港喇。