Gourmet Coffee and Delicatessen（20100611）

公司附近開左間新野，賣三文治同咖啡。咖啡我就麻麻，不過三文治係歐式岩晒我。呢間野有好多款三文治，包都有幾款。價錢係區內都算貴，一個三文治加杯咖啡起碼$40以上。好彩有是日午餐，$30有三文治﹑Ceasar Salad同埋是日咖啡。是日午餐係燒牛肉三文治，而是日咖啡就是莫加豆咖啡。

Ceasar Salad，生菜新鮮爽脆，不過我淨係鍾意食綠色既菜，呢盒太多白色；其他料都幾足，salad dressing﹑麪包粒﹑芝士條同埋好少好少既煙肉
　



燒牛肉三文治，有燒牛肉﹑生菜﹑蕃茄同埋青瓜；本來仲有青椒，不過我唔食所以叫佢唔好落；蔬菜新鮮多汁，惟一失敗既係青瓜切得太厚，食落感覺麻麻，好在冇苦澀味；包係我最歡喜既意大利軟包，個包真係幾軟，而且仲有淡淡既牛油香味，好正
　

　

最後係唔太重要既咖啡，聞落唔夠香，飲落都唔算濃，唔識欣賞呢隻莫加豆


一個午餐有包有沙律有野飲，食物質素又唔差，$30算係合理價錢。但係食一個是日午餐，起碼用左5件外賣餐具：沙律一個膠盒﹑三文治一個膠盒﹑咖啡一個紙杯連蓋﹑食沙律既膠叉﹑裝咖啡奶既膠杯仔（佢仲畀多左兩杯我），真係好唔環保。而且我相信$30裡面最少有1/6既錢係用左係呢堆野度，所以都係少吃為妙。

是日午餐：燒牛肉三文治＋Ceasar Salad＋咖啡，$30