Morocco Afterword

返到London既Stansted機場已經夜深，好多鋪頭都關門大吉，好彩仲有幾間餐廳有開。搵到間食意大利快餐既，食左個呢生人第二好味既Carbonara。呢餐雖然只係快餐，但十分滿足，因為之前幾日都冇啖好食，返到英國真係有返到屋企既感覺。食飽之後就就地係長凳度訓覺，職員係唔會理。快餐店既凳係木凳，好硬訓得唔舒服。見到對面ｄ人訓係Pret A Manger門外既梳化，有ｄ後悔冇去霸個個位。訓下醒下，天光既時候機場又回復返人來人往既狀態，我地又要搬竇。等到夠鐘坐火車就真正踏上歸途喇。

第一次去摩洛哥呢ｄ同香港／英國咁唔同既地方，真係見識左好多野：

係Medina行黎行去既時候，不停聽到Konichiwa。睇黎日本仔係摩洛哥既大客，摩洛哥人見親亞洲人都當左係日本仔先。我地聽到日文梗係唔鬼理佢。之後偶爾聽到韓文，我地一樣唔理。再聽到一次半次成蟲個名，雖則佢地撞中左，我地都係唔想理佢。因為我地唔認為成蟲可以代表香港。XD

係小鎮同村既摩洛哥人比較單純友善，通常都好肯幫人。係大城市既就比較資本主義ｄ，聽講ｄ細路見你迷路會帶你去，不過之後係要畀錢既。雖則係咁，但我覺得摩洛哥其實好安全，感覺上比傳聞中既意大利同法國安全。起碼冇人會無啦啦走黎坑錢搶野先。

係摩洛哥買野一定要講價，特別係手信。賣野ｄ人都講到明，佢地係興bargain。一開始佢地開價開得好高，我地通常由三份一價錢講起，講到一半咁上下就差唔多。

其他人講英文同法文摩洛哥人都識聽，好難講人壞話或者討論價錢。廣東話確實好用，因為我地講乜都冇人識聽。但係有時香港廣東話直接翻譯自英文，摩洛哥人會聽得出。就好似「歐羅」咁，我地講價時老細竟然聽得出，於是我地要改改佢。其他翻譯自英文既廣東話都要轉返做純中文。例如「的士」＞「計程車」，係摩洛哥個幾日完全感受到我地中文進步左好多～

總括黎講摩洛哥真係好值得去。如果由香港去既，最少留兩個禮拜，去多ｄ城市：首都Marrakech，海邊城市Rabat同Essaouira都可以去下。而北非名城Casablanca，可以先睇睇其他人地遊記再決定去唔去。