導遊著住傳統摩洛哥服飾，好似係個斯文人咁。佢話Medina再有分新城同舊城。好似話新城ｄ路冇咁窄同迷亂，而舊城當然係成個迷宮咁。但係其實都分唔清邊忽係新邊忽係舊。對我地黎講成個Medina都係一個迷宮。
第一個景點係全世界最古老既大學University of Al-Karaouine，係公元859年起好。好難想像全世界最古老既大學竟然會係非洲。
之後就去左睇一個位於街邊既古老water clock。導遊話以前有人睇住ｄ水流，夠鐘就會大嗌通知ｄ人。再行就去左Medina既藍色城門。我地第一日到達Fez既時候已經欣賞過佢夜晚既景觀，原來日頭睇又有唔同既感覺。
穿梭於大街小巷同人地既騎樓底之後就黎到第一個購物點皮革廠。上天台之前老細會畀ｄ薄荷葉我地，如果覺得ｄ動物皮臭既話可以索下。但我覺得薄荷葉仲臭過ｄ動物皮。上天台會見到晒成個皮革廠既運作。基本上就係一個個水池，有ｄ係裝白鴿屎洗動物皮，有ｄ係過水，有ｄ係染色。睇個樣應該全部都係有機材料，唔同顏色就用唔同既植物。老細話真正既皮革製過之後係唔會有味。我地現場聞過佢ｄ製成品又真係冇皮味架喎。其實佢有ｄ袋都幾靚，個feel仲要係Oxford bag咁既款，都想買返個。不過肯定好貴，又要講一輪價，所以都係冇買。雖則係購物點，但都唔會好似大陸個ｄ咁唔買就死騾住你唔畀你走。而且個導遊似係冇佣收，所以睇完就好輕鬆咁離開。
又再穿梭係人群之中，經過一個市場，有好多食物同日用品賣。然後就去左一個清真寺門外影幾張相。跟住就係一個古時既驛站。以前ｄ人做生意經過就會鎖ｄ貨係樓下然後上樓休息。
再行去到一個位抖抖買支水飲既時候，有人撩導遊帶我地去佢間pharmacy度行下，話唔使錢既。摩洛哥既pharmacy就即係類似Boots或者superdrug咁賣下護理products，而唔係賣藥。入到去一睇個裝潢都知係坑遊客既鋪頭。老細叫我地坐低介紹下ｄ產品，主要都係ｄ唔同功用同香味既油同護膚品。跟住仲叫左兩個女仔黎幫我地按摩，我地又竟然畀佢按…本來ｄ油都幾香，諗住買返支既，但一問價就知咩事。完全係坑得就坑，冇可能會買既價錢。於是我地就諗住走喇，點知走到一半時老細叫我地畀tips個兩個按摩姐姐。咁諗住一人畀dh5都唔OK啦，點知佢地竟然嫌少話唔要喎。本來都諗住唔要算架喇，但朋友最後都畀左每人dh10。出到門口導遊見我地畀錢，就話鬼帶我地黎個人，話撩我地去既時候又話唔使錢，而家又要我地畀錢咁。話左兩句我地就走左喇。
下一個景點係另一個皮革廠。去既時候經過間圖書館，係門口望兩望就走左喇。另一間皮革廠睇既野都係差唔多，賣既野就冇第一間咁靚。跟住去左另一個細既pharmacy畀朋友畫henna。個度又有之前見到既油賣喎，睇個格局係做本地人生意，價錢應該唔會好貴，就問下老闆娘喇。雖則講完價都係覺得有ｄ貴，不過講左咁耐價點都要買，於是就用dh65買左支香油用黎搽頭髮。最後一站就係地毯鋪。本來都冇諗住買野架喇，但係有ｄ用仙人掌纖維做既地毯又好似好靚咁。於是又講下價，又買左喇。係個刻我地除左最後一餐飯錢同埋搭的士去機場既錢，已經冇乜錢淨，而竟然係我地畀錢買左地毯之後，老細叫我地畀dh20 tips佢個staff。我地就真係淘空褲袋挖晒ｄ散紙畀佢。夾埋都未必有dh10。哈！
好喇成個tour就咁完結，返到hostel就見到幾個人，傾落發現佢同我地搭同一班機返London，於是就一齊叫車去機場。然後發現有個係London做野既美利堅女仔係度玩緊隻烏龜仔，原來係用幾十dh係街買返黎既。見佢好似好興奮咁，仲話要帶佢返英國養，真搞笑。
抖左陣就準備出去食晏，烏龜姐自己一個人所以就跟埋一齊。烏龜姐話有樣野一定要試下，於是我地就係附近搵左間小食店食晏。個樣一定要試既就係Pastilla，係外甜內鹹既雞批或者白鴿批。一個Pastilla睇落唔係好大，但原來好飽肚，兩個人食一個都未必食得晒。
食完飯就周圍行下買下手信。其實個時我地已經冇乜錢，要買都要揀過度過。行到咁上下都係時候返hostel搭車去機場，終於可以返英國喇。叫車時hostel老細話dh200七個人一架車，點知到機場落車時司機竟然收我地dh250。我地就同佢講啦，佢就話佢都唔知架，仲打電話返hostel叫我地自己拆掂佢。點知聽電話個個人，講兩講就發老脾態度好差。其實都唔知佢係咪真係hostel既人黎。最後都費事同佢拗，就畀左dh250。
去到機場就搞手續上機，過關時我地都好留意究竟烏龜姐可唔可以順利帶到烏龜仔出境。搭車時我地已經係度討論緊應該點包好烏龜仔，擔心佢會畀X-ray照到出黎。最後發現摩洛哥機場個X-ray根本照唔到ｄ乜咁滯，只係照到一pat野，真求其。最後各人順利過關上機返到London，然後就經歷左第一次既訓機場。
沒有留言:
發佈留言