尖沙咀Manna Joy（20100624）

經過見到呢間野好似好吸引咁，又有刺身壽司又有西式，於是搵日去試下。結果發現冇乜特色，食物質素ok但價錢偏貴，惟一值得讚既係環境夠浪漫囉。

前菜點左兩個刺身三色，不過不失；三文魚唔夠肥唔夠香而且有少許筋；帶子幾鮮甜但切得太簿；八爪魚爽口但切得好怪


南瓜湯跟蒜茸包，南瓜湯幾濃味但唔夠滑，裡面都有幾粒帶子既；蒜茸包唔熱又唔係好脆，麻麻地
　

酥皮焗鵝肝牛柳，鵝肝細到搵唔到，爭ｄ想叫人黎問下邊度有鵝肝，而且完全冇油香，唔掂；牛柳正常唔韌有肉味；其他配菜有粟米仔同煎過既南瓜，好似好健康咁


仲有個龍蝦汁海鮮闊麪冇影，有兩隻連殼扇貝﹑魷魚﹑蝦﹑青口同魚等等好足料；龍蝦汁香濃，闊麪軟硬適中

甜品係心太軟，原本有兩個甜品，waiter話加廿蚊可以轉二人份量既心太軟；心太軟好細件，而且未黎到已經流晒出黎；還好味道唔錯，加埋雪糕食好正；但係佢呢個二人份量好似仲少過出面既一人份量囉
　

最後飲品要左兩杯檸水，點知最簡單既檸水都出事，檸檬有澀味。我地食好少野，三個人食左兩個set dinner，每人百幾蚊到。如果食正常份量起碼二百幾一個人，佢ｄ野唔值呢個價錢。我個fd仲話聞到waiter身上有煙味，呢樣簡直係唔可以接受。一間中高檔餐廳既waiter身上點可以有煙味？茶餐廳咩？如果間茶餐廳個伙記有煙味，我都唔會再去，所以呢間亦都唔會再去。