因為時間有限，我地第一日七點幾飛到Fez，第二日就跟三日兩夜團入沙漠，最後一日先係Fez度閒逛。
落機之後係機場唱錢，排緊隊既時候發現機場ｄ職員陸續收工，連燈都熄埋。個時先至七點幾咋，入境時就咁睇下passport就算，連行李都冇check，真求其…
係機場門口已經有人撩我地搭車入城，開頭講dh150，講下價就變左dh120，之後第個司機又想話收dh150，我地死都唔肯，最後都係畀返dh120。坐左大約半個鐘至九個字就入到城，但我地間hostel係古城入面，車入唔到去。本來我地都諗住自己行入去架喇，但唔知溝通唔到定點，司機問街邊鋪又好似唔識咁。問左幾個路人，最後有人打電話畀hostel搵人黎接我地。
黎接我地既係個後生仔，好似好殷勤好熱情咁，事後諗返其實佢未必係想像中咁好人。
係古城入面左穿右插終於入到hostel，疑似老細就招乎我地飲薄荷茶，第一次飲幾得意既，但之後差唔多日日飲，仲要勁多薄荷，多到有少少苦，就會覺得聞到都想嘔。相反唔落薄荷就咁飲茶又幾好味，因為摩洛哥人落勁多糖係ｄ茶度，甜甜地幾好飲。
等佢地沖茶都等左好耐，期間就係度傾偈。傾開我地第日跟個團，疑似騙案就發生喇。首先我地講左跟邊間公司，老細同後生仔就上網睇，話個導遊佢地識既，跟佢冇問題。跟住後生仔就打電話同個人confirm第日接我地既時間。出左去講完電話之後又話個導遊唔係佢地識個個，要再打電話同佢confirm佢有冇牌之類。之後又出去講電話，講完一輪之後就話個導遊係無牌既，叫我地唔好跟。
當時岩岩到埗，又唔係好熟當地ｄ野，而後生仔之前又講過下佢地都有團入沙漠，於是就惟有問佢地既團幾錢同點行。本來我地個團係€750四個人三日兩夜，除左lunch之外全包既。後生仔就開價€165一個人，即係€660四個人。我地就順勢叫佢包埋lunch。就係咁，我地就落左搭喇。
之後飲完茶，傾完個團ｄ野，就終於可以出去食飯喇。後生仔介紹左古城入面一間餐廳，唔算貴既，平均dh40一個菜。四個人叫左三樣野，tajine with chicken, couscous with beef同meat kebab。係摩洛哥食飯，無論食乜都有橄欖同麪包跟。就係好彩有呢ｄ麪包，我先可以捱到咁多日…唔知係水土不服定咁岩發作，我個晚個肚好唔舒服，好似平時腸胃炎發作咁。之後個幾日都係靠呢ｄ麪包維持生命…
食完飯係古城同hostel影下相就訓喇。我地住四人房連廁所，唔係好新但都叫乾淨企理既。訓到兩點幾個肚唔舒服，過左一個囉囉攣既夜晚，第朝就準備入沙漠。
沒有留言:
發佈留言