摩洛哥既早餐，第一次見就覺得好豐富，但之後日日都係食呢ｄ野就會覺得有ｄ厭。首先有兩至三款乾糧：餐餐都有既麪包，類似印度薄餅不過冇咁油既煎餅同埋應該係用couscous整既鬆餅。跟住有橄欖，芝士，又似牛油又似忌廉既野同埋jam。野飲就通常係橙汁，咖啡或者茶。日日如是，風雨不改。聽講ｄ鮮榨橙汁好好飲，但我又唔敢飲，直到最後一日我先敢飲。一飲發現真係好好味，飲完即刻想飲第二杯，好似上癮咁。
食完早餐司機就帶我地上車，係一架幾新既4×4，都幾舒服。坐左個零鐘就去到第一個所謂景點，Ifrane。上網睇相好似好靚咁，但唔知係我地冇認真行定點，其實真係冇咩好睇…司機話我地係度行十五至二十分鐘或者可以入cafe飲下咖啡。我地買下名信片同郵票，其實都夠鐘，就係架車附近等佢。點知司機係cafe入面嘆緊，等左一陣先出黎。自此我地就發現其實摩洛哥人對時間既觀念係好鬆散既，ｄ時間永遠都講唔準…
上車後就去下個景點，睇馬騮。查實睇馬騮冇乜興趣，不過我諗ｄ鬼應該幾鍾意，所以司機就停低畀我地睇下咁。係我地行返上車既時候，見到架4×4突然向前行，司機就係外面申隻手入去追住架車，想整停架車。哦，原來冇拉手掣。其實呢一幕我地四個都睇到晒，司機都知我地睇到。不過都唔知點落台，我地就惟有扮冇事繼續行上車。其實都幾好笑～
又坐左好耐車，黎到一個小鎮食晏。間野只係得幾樣野食。我地叫左兩個tajine，仲要只有羊肉。我又唔食得，所以就只可以食麪包。兩個tajine又係用ｄ有塔既煲煮，我懷疑係摩洛哥淨係得呢種煲。食完飯仲有蜜瓜食。發現原來摩洛哥既密瓜十分之甜，甜到好似打左糖水咁，多汁又解渴，食多幾舊唔驚中暑。
食完諗住出去影下相，買支水咁。影完去返架車度諗住司機會出現，點知唔見左人。我地係度等下，又去餐廳度搵下，搞左好耐都唔知佢去左邊。惟有企係架車附近等佢，當時烈日當空，冇三十度都廿八九度。仲要我地四條友係成個鎮惟一既亞洲人，ｄ人行過就望住晒，雖則只係八卦好奇咁望，但都覺得好怪。
等左都有十幾分鐘，司機終於出現，各人就上車繼續旅程。去到另一個城市，阿司機就停下買下野咁，我地又去下廁所。之後再行左陣司機就停埋一邊話要上多個人，跟住仲話要換司機，等佢車我地入去沙漠喎…個時竟然唔識驚，就咁問左兩句就算。事後諗返，一來個司機唔知咩人，二來車尾又坐多個人，都唔知想做咩。雖則我地四個人，佢地兩個人，但佢地在暗我地在明，前後夾攻真係溶左我地都唔知。換司機之前其實我地已經訓到不醒人事，但換人之後幾眼訓我地都唔敢訓，要睇實發生咩事。當時其實都冇驚既感覺，只係覺得要提高警覺。
又坐左一輪車，去到一個峽谷中間既綠洲影下相。其實食飯之前沿途已經開始係荒漠咁既樣，好似美國西部咁好乾，得ｄ沙石同少少植物。之後就越黎越乾同荒蕪，仲見到ｄ好靚既峽谷。黎到呢個峽谷綠洲，見到下面ｄ一粒粒方形既屋同埋一大片棕櫚樹，我就諗起一隻我好鍾意既pc game，pharaoh。呢個情景同隻game既晝面真係一模一樣，仲要由上面望落好，就好似親身係隻game入面咁，好鬼得意。
好喇，又坐左好耐車，七點幾終於到左入沙漠前既落腳點。安頓好諗住有飯食啦，點知岩岩先開始煮，好彩ｄ人都醒目，識攞ｄ包黎食下。係我地食緊「下午茶」既時候，第二個司機又離我地而去，揸埋架4×4走人，連同我地講都冇講聲…真神奇。當時我地仍然係唔識驚，冇乜點理佢就繼續食「下午茶」。
終於等到天黑，等到開飯。今次呢個又係tajine，不過有幾隻蛋係上面，好似好正咁。可惜我唔食得，試左少少個汁既味，有ｄ似羅宋湯，加埋蛋如果撈飯一定好好味。
食完飯當地ｄ人就打下鼓唱下歌咁，搞搞下又捉埋我地出去跳舞，其實係畀佢地舞，轉到我地暈佗佗。舞完之後又繼續唱，佢地好似冇意思要停咁。個時其實已經成十一點幾，於是我地決定佢一唱完一首就起身走人，好彩佢地都識做。
返房搞下野就上天台睇星，都睇到幾多星，但係個時仲有光，所以同想像既有ｄ唔同。睇左一陣就返落去訓喇。間酒店用發電機既，夜晚ｄ燈開一陣就冇。睇完星就熄晒燈，連涼都冇得沖，
惟有就咁訓。黎得呢ｄ地方都預左，所以都冇乜野。但係間房真係好熱好焗，熱到訓唔到。諗住出去剛才食飯個度訓啦，原來個度ｄ人都係訓個度既，有ｄ仲訓係地下添…根本冇位畀我地訓，惟有返入房迫自己訓。
因為實在太熱，我地連門都冇閂。成晚都唔係好訓到，期間又聽到有人黎搞下我地度門，就更加唔敢訓著，個時開始有少少驚既感覺，係驚有人入黎偷野，周圍乜都冇都唔知點算。
訓到差唔多天光，就開始涼ｄ，訓得好ｄ喇。
沒有留言:
發佈留言