食完就出去酒店外圍行下，出左大門冇幾步就有個揹住背囊仔既當地人黎帶我地周圍行。原來酒店後面仲有好大地方，有ｄ田種下野。聽當地人講應該大部份蔬菜同肉類都係自給自足。跟住仲見到佢地起緊個泳池。當時烈日當空，天氣又乾燥，真係好想去游下水。可惜個泳池都唔知幾時先起得完。
差唔多行完既時候，帶住我地個當地人就入左個帳幕坐低，又叫我地坐低。坐低之後佢就係個背囊度拎左ｄ用化石整既碟同擺設出黎sell我地。佢話係佢阿爸整既，叫佢攞去賣幫補下家計。之前我地仲奇怪佢做咩咁近都要揹住個背囊，原來裝住ｄ貨。我地當然知道呢ｄ地方一定開價好貴啦，而且對佢ｄ野真係冇咩興趣。所以就同佢講要諗下，跟住就準備走喇。走之前見佢帶我地行左咁多地方，我地又冇幫襯，就諗住畀dh10 tips佢當多謝佢帶我地行。點知佢好老實話唔要喎，我地話唔緊要佢都堅持唔要。就咁我地就走左喇。
返入酒店又hea下，就食晏喇。又係食個ｄ野啦，我都係食包解決。食完又冇野做，就同另外ｄ人玩下牌咁。佢地叫呢種牌做domino，係每人派幾粒牌，跟數字出牌，最快出晒牌既就贏。呢ｄ玩意對香港人黎講確實幾無聊，但係對當地人黎講就係得呢ｄ小玩意同打下鼓作為娛樂。玩左十鋪八鋪其實都真係幾無聊，於是就去打下鼓。當地人都好樂意教我地打，因為佢確實係冇咩好做。
玩到咁上下就返房攤抖下，到夠鐘就準備入沙漠喇。
同我地一齊入去既仲有對美利堅情侶，我地六個就騎六隻駱駝，帶路個個就行路。第一次騎駱駝，之前睇電視都知佢起身個下幾驚嚇，好彩有心理準備冇畀佢嚇親。一路雖然都坐得算舒服，但一落斜既時候會好dun。
帶頭個隻駱駝好似識路咁，有時帶路個個行開幫我地影相佢都識自己行。有時經過ｄ草佢又走去食，仲要一路食一路屙。ｄ駱駝屎一粒粒咁跌落沙漠再碌走，個情境都幾好笑。行左一個鐘多ｄ就到營地，落左駱駝之後帶頭人就稍稍地去左煮飯。我地就係度影下相，又hea下。營地個度有好多隻貓，有隻仲特別黐人，成日走黎撩人。
等左唔知幾耐終於有飯食，又係食個ｄ野。ｄ貓一見到開飯就走黎等人餵，有ｄ仲大膽到走上張凳度搵野食。後尾有人驚貓，帶頭人就坐係帳幕門口唔畀ｄ貓入黎。佢冇同我地一齊食，唔知佢自己食左ｄ咩。
食完飯都成十一點，其實又係冇野做，就坐係出面睇下星。個月亮好光，所以個天唔會真係滿天星星，但比起香港或者英國，都仲係睇到好多星星。我帶左個星圖，帶頭人就好似好鍾意咁攞個星圖係度對，仲叫我地譯畀佢聽。
睇完星帶頭人就講下笑話出下IQ題畀我地估。美利堅男人初時都有估下，之後開始覺得無聊就訓左係度冇理佢。我地再傾左陣就訓覺喇。本來想訓外面，涼ｄ舒服ｄ。但係營地度好多蟲，ｄ蟲仲要好似ｄ駱駝屎咁款。我地驚朝早佢地訓醒會爬黎我地度，所以就訓帳幕。雖然帳幕冇咁涼，但都比起酒店房好好多。竟然帳幕仲好訓過酒店房。
帶頭人話第朝叫我地起身睇日出，即係訓得幾個鐘。
沒有留言:
發佈留言